Na. Timothy Mwakyenda – MAELEZO Waziri Mkuu wa Jamhuri ya Muungano wa Tanzania Mhe. Dkt. Mwigulu Lameck Nchemba, amewataka Watanzania kutumia bidhaa zinazozalishwa nchini ili kukuza viwanda vya ndani, kulinda ajira, kuongeza mapato ya taifa na kuimarisha uchumi wa wananchi. Ameyasema hayo tarehe 4 Novemba, 2026 jijini Dodoma, alipokuwa akizindua Sera ya Maendeleo Endelevu ya Viwanda ya mwaka 2025 na Sera ya Maendeleo ya Ujasiriamali Mdogo na wa Kati ya mwaka 2003, toleo la mwaka 2025, ambapo alimwakilisha Rais wa Jamhuri ya Muungano wa Tanzania, Mhe. Dkt. Samia Suluhu Hassan. Amesema kuwa sera hizo zinatarajiwa kuimarisha uzalishaji wa bidhaa nchini, kupanua fursa za biashara na uwekezaji na kuwezesha wajasiriamali kukua kutoka biashara ndogo kwenda za kati na kubwa, hatua itakayochochea upatikanaji wa ajira na kuongeza kipato cha wananchi na kusisitiza kuwa watanzania wana wajibu wa kuunga mkono viwanda vya ndani kwa kununua bidhaa zake. Viwanda vinapopata soko la uhakika vinaweza kuongeza uzalishaji, kuajiri watu wengi zaidi na kuchangia mapato ya serikali kupitia shughuli za kiuchumi. Amesema ni muhimu kubadili mtazamo kuhusu wawekezaji na wafanyabiashara kwa kuwachukulia kama washirika muhimu wa maendeleo ya taifa, badala ya kuwawekea mazingira yanayokwamisha shughuli zao na kueleza kuwa sekta binafsi ina nafasi kubwa katika kufanikisha Dira ya Taifa ya Maendeleo 2050, hususan katika uwekezaji, uzalishaji na ajira kwa vijana. Aidha ameongeza kuwa serikali itaendelea kuboresha mazingira ya biashara na uwekezaji, huku akizitaka wizara na taasisi husika kuondoa vikwazo visivyo vya lazima vinavyoweza kudhoofisha shughuli za biashara na kusistiza kuwa kama sheria zinapokuwa kikwazo kwa maendeleo ya wananchi, zinapaswa kufanyiwa marekebisho ili ziendane na mahitaji ya sasa ya uchumi. Pamoja na hayo Dkt. Nchemba amezitaka sekta ya viwanda na biashara, kwa kushirikiana na wizara nyingine na sekta binafsi, kusimamia utekelezaji wa sera hizo kwa kuweka mikakati inayopimika na kufanya ufuatiliaji na tathmini ya mara kwa mara na kusisitiza kuwa ushirikiano huo ni muhimu katika kuongeza thamani ya mazao ya kilimo, mifugo, uvuvi na rasilimali nyingine za nchi kabla ya kuuzwa katika masoko ya ndani na nje. Pia, amesema kuwa serikali itaendelea kuboresha miundombinu wezeshi, ikiwemo nishati, maji, barabara na reli, ili kupunguza changamoto za uzalishaji na kurahisisha usafirishaji wa bidhaa na kubainisha kuwa mazingira bora ya uzalishaji yatawezesha viwanda kuongeza tija na ushindani, huku wananchi wakinufaika kupitia bidhaa zinazopatikana kwa uhakika na fursa nyingi zaidi za kiuchumi.