Karibu!
Tunakukaribisha kwenye tovuti rasmi ya Msemaji Mkuu wa Serikali upate taarifa na habari sahihi zenye kuakisi malengo ya Serikali, Dira ya Maendeleo ya Taifa 2050 na matarajio ya Watanzania.
Tunakukaribisha kwenye tovuti rasmi ya Msemaji Mkuu wa Serikali upate taarifa na habari sahihi zenye kuakisi malengo ya Serikali, Dira ya Maendeleo ya Taifa 2050 na matarajio ya Watanzania.
Na Bupe Mwaiseje – MAELEZO Serikali inajenga kituo maalum cha wanahabari jijini Dodoma, kitakachojulikana kama Tanzania Media Center, kwa lengo la kuwawezesha waandishi wa habari kupata eneo salama na rafiki kwa ajili ya kuandaa habari, kufanya mahojiano na kutekeleza shughuli zao za kitaaluma wanapokuwa katika majukumu ya kikazi mjini humo. Akizungumza Oktoba 31, 2026, katika Kongamano la Mwaka la Tathmini ya Huduma za Habari na Mawasiliano Vijijini Tanzania, lililowakutanisha wanachama wa Chama cha Waandishi wa Habari Vijijini (RUJAT), jijini Dodoma, Katibu Mkuu wa Wizara ya Habari, Utamaduni, Sanaa na Michezo na Msemaji Mkuu wa Serikali, Gerson Msigwa, amesema kituo hicho kinajengwa eneo la Mzunguni jijini Dodoma na kitakuwa na ghorofa mbili pamoja na maeneo maalum kwa ajili ya shughuli mbalimbali za wanahabari. Amesema ujenzi wa kituo hicho unalenga kutatua changamoto ya ukosefu wa eneo maalum la kufanyia kazi inayowakabili waandishi wengi wa habari wanapofika Dodoma kwa shughuli za kikazi, hali inayowalazimu kutumia vyumba vya hoteli au maeneo mengine yasiyo rasmi kuandaa habari na kufanya mahojiano, jambo linaloweza kuhatarisha usalama na usiri wa taarifa. Ameeleza kuwa kituo hicho kitakuwa sehemu ya kukutanisha wanahabari, kufanya kazi na kupokea watu wanaohitaji kutoa mahojiano, hivyo kuwawezesha kutekeleza majukumu yao katika mazingira yanayozingatia mahitaji ya taaluma ya habari. Aidha, amesema ukumbi uliopo katika ofisi za Idara ya Habari utaendelea kutumika kutoa huduma kwa waandishi wa habari wanaofika Dodoma kwa shughuli mbalimbali za kikazi. Katika hatua nyingine, Msigwa amewataka waandishi wa habari kuimarisha weledi na kuandika habari zinazogusa maisha ya wananchi, hususan wanaoishi vijijini, akibainisha kuwa sehemu kubwa ya Watanzania wanaishi katika maeneo ya vijijini, lakini vyombo vingi vya habari vimeelekeza nguvu zaidi katika kuripoti matukio ya mijini. Amesisitiza kuwa wanahabari wanapaswa kufanya uchunguzi wa kina na kufuatilia changamoto zinazowakabili wananchi hadi pale zinapopatiwa ufumbuzi. Akitolea mfano, amesema taarifa za habari kuhusu changamoto za upatikanaji wa maji na dawa zimekuwa zikichochea hatua za kutatua matatizo hayo. Vilevile, amesisitiza umuhimu wa mafunzo endelevu, matumizi ya teknolojia na uandishi unaozingatia ushahidi pamoja na maslahi ya umma. Amewataka wanahabari kujiepusha na vitendo vinavyoweza kushusha heshima ya taaluma ya habari na badala yake kuimarisha ushirikiano kati yao na maafisa habari wa Serikali.
Na Baraka Messa – MAELEZO Rais wa Jamhuri ya Muungano wa Tanzania, Mhe. Dkt. Samia Suluhu Hassan, amesema ujenzi wa Mji wa Serikali Mtumba jijini Dodoma ni sehemu ya dhamira ya Serikali ya kusogeza huduma karibu na wananchi, kurahisisha upatikanaji wake na kuhakikisha huduma za umma zinapatikana kwa ufanisi na usawa katika maeneo mbalimbali ya nchi. Amesema hatua hiyo inaendeleza maono ya Baba wa Taifa, Hayati Mwalimu Julius Nyerere, aliyetangaza mwaka 1973 uamuzi wa kuhamishia makao makuu ya nchi Dodoma, kwa lengo la kuimarisha uwiano wa maendeleo na kusogeza shughuli za Serikali karibu zaidi na wananchi. Rais Samia ameyasema hayo Oktoba 30, 2026, wakati wa hafla ya uzinduzi wa majengo ya wizara na taasisi za Serikali pamoja na barabara zilizojengwa katika Mji wa Serikali Mtumba, jijini Dodoma, iliyohudhuriwa pia na Rais wa Jamhuri ya Angola, João Lourenço. Amesisitiza kuwa ujenzi wa majengo ya kisasa pekee hautoshi kutimiza azma ya Serikali, bali unapaswa kwenda sambamba na utoaji wa huduma bora, kwa kuimarisha matumizi ya mifumo ya TEHAMA ili taasisi za Serikali ziwasiliane kwa ufanisi, kupunguza urasimu na kurahisisha huduma kwa wananchi. Aidha, amewataka watumishi wa umma kutunza majengo na miundombinu iliyojengwa, kuyatumia kwa ufanisi na kuhakikisha yanakuwa mazingira bora ya kufanyia kazi na kuhudumia wananchi. Ameeleza pia kuwa ukuaji wa Dodoma unahitaji mipango madhubuti ya matumizi ya ardhi na maendeleo ya mji ili kuendana na hadhi yake kama makao makuu ya nchi. Katika hatua nyingine, Rais Samia ameeleza umuhimu wa kuimarisha uhusiano wa kihistoria kati ya Tanzania na Angola, akibainisha kuwa uamuzi wa kuipa barabara moja ya Mji wa Serikali jina la Rais wa kwanza wa Angola, Agostinho Neto, ni ishara ya kuthamini mchango wa viongozi wa mataifa hayo katika historia ya ukombozi wa Afrika. Kwa upande wake, Rais wa Angola, João Lourenço, ameishukuru Tanzania kwa mchango wake katika harakati za ukombozi wa Angola na kusisitiza umuhimu wa kuendeleza ushirikiano kati ya nchi hizo, hususan katika sekta za usafiri wa anga na reli. Naye Waziri wa Nchi, Ofisi ya Rais, Mipango na Uwekezaji, Prof. Kitila Mkumbo, amesema utekelezaji wa mradi wa Mji wa Serikali ulianza mwaka 2016 katika Awamu ya Tano ya Serikali na kugharamiwa kwa kutumia fedha za ndani, hatua inayoonesha dhamira ya nchi katika kuwekeza kwenye miundombinu ya umma na maendeleo ya taifa. Kwa ujumla, Mji wa Serikali Mtumba ni zaidi ya mkusanyiko wa majengo ya wizara na taasisi za umma; ni hatua muhimu katika kutekeleza azma ya kuifanya Serikali iwe karibu zaidi na wananchi. Mafanikio yake yatapimwa kwa namna miundombinu hiyo itakavyotumika kuboresha huduma, kupunguza gharama na muda wa kuzifikia, pamoja na kuongeza ufanisi wa utendaji wa Serikali.
Na Timothy Mwakyenda – MAELEZO Safari iliyofanywa na Rais wa Jamhuri ya Muungano wa Tanzania, Mhe. Dkt. Samia Suluhu Hassan, na Rais wa Jamhuri ya Angola, Mhe. João Manuel Gonçalves Lourenço, kwa kutumia treni ya kisasa inayotumia nishati ya umeme kupitia reli ya SGR kutoka Dar es Salaam kuelekea Dodoma, Oktoba 30, 2026, ni hatua yenye ujumbe mpana kuhusu maendeleo ya sekta ya usafirishaji nchini Tanzania. Mbali na kuonesha kuimarika kwa ushirikiano kati ya nchi hizo mbili, safari hiyo imeonesha uwezo wa Tanzania kuwekeza katika miundombinu ya kisasa ya reli na kutoa huduma za usafiri zinazokidhi mahitaji ya wananchi na kuchochea maendeleo ya kiuchumi. Viongozi hao walianza safari yao katika Stesheni ya Magufuli jijini Dar es Salaam kuelekea Dodoma kushiriki hafla ya uzinduzi wa Mji wa Serikali Mtumba pamoja na barabara zake za lami. Matumizi ya SGR katika safari hiyo yanaonesha namna reli ya kisasa inavyoweza kuwa kiungo muhimu katika kurahisisha usafiri wa watu na usafirishaji wa bidhaa, huku ikitoa fursa kwa viongozi na wageni wa kimataifa kujionea maendeleo ya miundombinu ya usafiri nchini. Hatua hiyo pia ni kielelezo cha ukuaji na mabadiliko yanayoendelea katika sekta ya usafirishaji Tanzania, hususan katika kuimarisha usalama, ufanisi na ubora wa huduma za reli. Reli ya SGR ina nafasi muhimu katika kupunguza muda wa safari, kurahisisha usafiri wa wananchi na kutoa huduma inayoweza kukidhi mahitaji ya makundi mbalimbali, yakiwemo wafanyabiashara, watalii na wasafiri wengine. Hivyo, uwekezaji huo una mchango katika kukuza shughuli za kiuchumi na kuimarisha ushindani wa Tanzania kama kitovu cha usafirishaji katika ukanda huu wa Afrika. Akizungumza kabla ya safari hiyo, Rais Samia alisema matumizi ya SGR yanaonesha dhamira ya Tanzania na Angola ya kuimarisha ushirikiano katika sekta ya usafirishaji, hususan reli, kwa lengo la kurahisisha usafiri wa watu na usafirishaji wa bidhaa kati ya nchi hizo na maeneo mengine ya Afrika. Alisema Tanzania inaendelea na ukarabati wa reli ya TAZARA inayounganisha nchi hiyo na Zambia kupitia Kapiri Mposhi, huku Angola nayo ikiendelea na ukarabati wa reli ya Benguela. Hatua hizo zinatarajiwa kuimarisha muunganiko wa reli na kurahisisha biashara katika ukanda huo. Katika mazungumzo yetu tumekubaliana tuunganishe korido zetu kati ya Benguela na korido ya ukanda wa Kati ya Tanzania ili kurahisisha usafiri na usafirishaji wa watu na bidhaa. Ndiyo maana tumeamua kutumia usafiri huu kuonesha kwamba inawezekana Kwa mtazamo mpana, matumizi ya SGR kwa viongozi hao ni fursa muhimu ya kuitangaza Tanzania katika medani za kimataifa kama nchi inayopiga hatua katika ujenzi wa miundombinu ya kisasa ya usafiri. Reli hiyo inatoa taswira ya Tanzania inayowekeza katika teknolojia na huduma zinazokidhi mahitaji ya sasa na zijazo, huku ikiimarisha uwezo wa nchi kuwahudumia wananchi na wageni wanaoitembelea. Aidha, kuunganisha korido za reli za Tanzania na Angola kunaweza kufungua fursa kubwa zaidi za biashara, utalii, uwekezaji na ushirikiano wa kiuchumi barani Afrika. Kwa ujumla, safari hiyo imebeba ujumbe kwamba SGR si mradi wa usafiri pekee, bali ni sehemu ya mkakati mpana wa maendeleo ya taifa. Ni miundombinu inayopaswa kuendelea kutunzwa, kuboreshwa na kutumiwa ipasavyo ili kuimarisha usalama, kuongeza ufanisi wa usafirishaji na kuchochea uchumi. Hatua hiyo inaweka msingi wa Tanzania kuendelea kujijengea nafasi kama kitovu muhimu cha usafiri na biashara katika ukanda wa Afrika Mashariki na Kati.
Na Neema Kaniki– MAELEZO Katibu Mkuu wa Wizara ya Habari, Utamaduni, Sanaa na Michezo na Msemaji Mkuu wa Serikali, Gerson Msigwa, amewataka Watanzania kuendelea kulinda amani na utulivu wa nchi ili kuwezesha utekelezaji wa miradi ya maendeleo, kukuza uchumi na kufikia malengo yaliyowekwa katika Dira ya Taifa ya Maendeleo ya mwaka 2050. Amesema hayo Oktoba 25, 2026, wakati akizungumza na waandishi wa habari katika ukumbi wa jengo la Wizara ya Habari, Utamaduni, Sanaa na Michezo jijini Dodoma, akisisitiza kuwa amani ni msingi muhimu wa utekelezaji wa mipango ya maendeleo na ustawi wa wananchi. Msigwa amesema Serikali inaendelea kutekeleza majukumu yake chini ya uongozi wa Rais wa Jamhuri ya Muungano wa Tanzania, Dkt. Samia Suluhu Hassan, huku utekelezaji wa Dira ya Taifa ya Maendeleo ya mwaka 2050 ukiwa umeanza kupitia bajeti ya Serikali ya mwaka 2026/27 na Mpango wa Nne wa Maendeleo wa Taifa ulioanza Julai Mosi, 2026. Amesema Dira ya Taifa ya Maendeleo ya mwaka 2050 imeweka lengo la kujenga uchumi wenye thamani ya Dola za Marekani trilioni moja kutoka takribani Dola bilioni 90 za Marekani, hatua inayohitaji ushiriki na uwajibikaji wa pamoja kutoka kwa Serikali, sekta binafsi na wadau wengine wa maendeleo. Mafanikio ya utekelezaji wa Dira ya Taifa ya Maendeleo ya mwaka 2050 yanahitaji uwajibikaji wa pamoja kwa wadau wote, Serikali inatarajiwa kuchangia asilimia 30 ya uchumi huo, huku sekta binafsi ikitarajiwa kuchangia asilimia 70. Amesisitiza kuwa kufikiwa kwa malengo hayo kunategemea uwepo wa mazingira ya amani na utulivu yatakayowawezesha wananchi kujikita katika shughuli za uzalishaji mali, biashara, hususan biashara ya nje, pamoja na kuboresha maisha yao na ustawi wa jamii kwa ujumla. Amesema vitendo vya vurugu na uvunjifu wa amani vinaweza kukwamisha shughuli za kiuchumi, kuchelewesha utekelezaji wa miradi ya maendeleo na kuathiri utoaji wa huduma kwa wananchi, hivyo kuwataka Watanzania kutokubali kushawishiwa kushiriki matukio yanayoweza kuhatarisha utulivu wa nchi. Natoa wito kwa Watanzania wote kuendelea kujiepusha na matukio yenye viashiria vya vurugu na uvunjifu wa amani, Watanzania wakatae watu wanaodhani wanaweza kufanikisha ajenda zao kwa kuwahamasisha kufanya vitendo vya uvunjifu wa sheria, pakichafuka hapa, hakuna mjomba wa kutusaidia zaidi ya sisi wenyewe. Aidha, Msigwa amewahakikishia wananchi kuwa Serikali pamoja na vyombo vya ulinzi na usalama vinaendelea kusimamia amani na usalama wa watu na mali zao, pamoja na kulinda mipaka ya nchi, huku akisisitiza kuwa hakuna mtu aliye juu ya sheria kwa sababu ya kauli au msimamo wake.
Na Bupe Mwaiseje – MAELEZO Rais wa Jamhuri ya Muungano wa Tanzania, Mhe. Dkt. Samia Suluhu Hassan, anatarajiwa kuzindua rasmi majengo na miundombinu ya Mji wa Serikali Mtumba, jijini Dodoma, Oktoba 30, 2026, katika hatua inayolenga kuimarisha ufanisi wa utendaji wa Serikali na kuboresha utoaji wa huduma kwa wananchi. Akizungumza na waandishi wa habari, katika Ukumbi wa Idara ya Habari – MAELEZO jijini Dodoma, Oktoba 25, 2026, Katibu Mkuu wa Wizara ya Habari, Utamaduni, Sanaa na Michezo na Msemaji Mkuu wa Serikali, Gerson Msigwa, amesema Serikali imewekeza takribani shilingi bilioni 700 katika ujenzi wa mji huo. Msigwa amesema ujenzi wa majengo ya kisasa ya wizara na taasisi za Serikali ulianza mwaka 2021, chini ya Serikali ya Awamu ya Sita, ukiwa ni sehemu ya utekelezaji wa uamuzi wa kuhamishia shughuli za Serikali kutoka Dar es Salaam kwenda Dodoma, uliotangazwa mwaka 2016 na Serikali ya Awamu ya Tano chini ya Hayati Dkt. John Pombe Magufuli. Ameeleza kuwa Mji wa Serikali Mtumba umejengwa kwa kuzingatia mahitaji ya sasa na ya baadaye ya kiutendaji, ukiwa na takribani kilomita 59 za barabara pamoja na mifumo ya kisasa ya mawasiliano inayowezesha taasisi za Serikali kuwasiliana na kutekeleza majukumu yake kwa njia ya mtandao. Amesema mifumo hiyo itapunguza urasimu na muda wa kushughulikia nyaraka, hivyo kuongeza ufanisi katika utendaji wa Serikali na kuharakisha utoaji wa huduma kwa wananchi. Faili likifika asubuhi linajibiwa mchana kwa sababu hakuna sababu ya kutuma watu na magari na bodaboda kwenda kusambaza barua. Barua zinatembea kwa mtandao. Aidha, amesema Tanzania imepokea ujumbe kutoka nchi zaidi ya 10 zilizofika kujifunza kuhusu ujenzi na uendeshaji wa Mji wa Serikali Mtumba, akibainisha kuwa miundombinu hiyo ina fursa ya kuwa kivutio cha utalii jijini Dodoma. Msigwa amewahimiza Watanzania kufuatilia uzinduzi huo, akieleza kuwa ni tukio muhimu katika historia ya maendeleo ya Dodoma na utekelezaji wa uamuzi wa kuifanya kuwa makao makuu ya Serikali.
Na Mwandishi Wetu – MAELEZO Tanzania imeweka lengo la kuwa miongoni mwa nchi 10 zinazoongoza duniani kwa uzalishaji wa chakula, ikiwa ni sehemu ya mkakati wa kuimarisha uchumi, kuongeza ajira na kuhakikisha usalama wa chakula kwa wananchi, kupitia uwekezaji katika sekta ya kilimo. Waziri Mkuu wa Jamhuri ya Muungano wa Tanzania, Mhe. Dkt. Mwigulu Nchemba, amesema azma hiyo imeainishwa katika Dira ya Maendeleo ya Tanzania ya mwaka 2050, inayolenga pia kuifanya nchi kuwa mzalishaji mkuu wa chakula barani Afrika. Akizungumza Oktoba 22, 2026, jijini Des Moines, Iowa, Marekani, wakati akiwasilisha mada kuu kuhusu mustakabali wa kilimo barani Afrika katika Mkutano wa Kimataifa wa Norman E. Borlaug (Borlaug Dialogue), Dkt. Mwigulu amesema Serikali inaendelea kukipa kilimo kipaumbele kutokana na mchango wake katika ukuaji wa uchumi na maendeleo ya taifa. Amesema chini ya uongozi wa Rais Dkt. Samia Suluhu Hassan, bajeti ya Wizara ya Kilimo imeongezeka kutoka shilingi bilioni 294 mwaka 2021/2022 hadi shilingi trilioni 1.241 mwaka 2025/2026, hatua inayodhihirisha dhamira ya Serikali ya kukifanya kilimo kuwa injini ya mageuzi ya kiuchumi, uzalishaji wa ajira, ukuaji wa viwanda na upanuzi wa masoko ya nje. Matokeo ya uwekezaji huo yanaonekana katika kiwango cha utoshelevu wa chakula nchini, ambacho kimefikia asilimia 130, hali inayoiwezesha Tanzania kukidhi mahitaji yake na kuzalisha ziada kwa ajili ya masoko ya kikanda na kimataifa. Aidha, mauzo ya nje ya mazao ya kilimo yameongezeka kutoka dola za Marekani bilioni 2.1 mwaka 2021/2022 hadi dola bilioni 3.7 mwaka 2024/2025, hatua inayoonesha nafasi inayozidi kuimarika ya kilimo katika kukuza biashara na mapato ya taifa. Waziri Mkuu Dkt. Mwigulu Nchemba anaeleza kuwa kilimo ni moja ya nguzo kuu za uchumi wa Tanzania, kikichangia asilimia 24.6 ya Pato la Taifa, kuajiri asilimia 65 ya nguvu kazi na kuzalisha takriban asilimia 30 ya mapato ya mauzo ya nje, huku kikiendelea kutoa malighafi muhimu kwa viwanda vya ndani. Pamoja na mafanikio hayo, anasema Serikali inatambua umuhimu wa kuendeleza kilimo kinachozingatia usalama na ubora wa chakula. Katika mkutano huo, Dkt. Mwigulu amempongeza Prof. Huub Lelieveld, mshindi wa Tuzo ya Chakula Duniani ya mwaka 2026, kwa mchango wake katika masuala ya usalama wa chakula. Amesisitiza kuwa usalama wa chakula haupimwi kwa upatikanaji pekee, bali chakula kinapaswa kuwa salama kwa matumizi, kuwa na virutubisho vinavyohitajika na kupatikana kwa bei nafuu ili wananchi waweze kumudu mahitaji yao ya lishe. Akizungumzia kaulimbiu ya mjadala huo, “Kabla Njaa Haijatushinda,” Waziri Mkuu amesema Afrika ina uwezo mkubwa wa kuwa mchangiaji muhimu wa usalama wa chakula duniani, badala ya kuendelea kuonekana kama bara linalokabiliwa na changamoto za upatikanaji wa chakula. Amesema kufikia azma hiyo kunahitaji uwekezaji zaidi kwa wakulima, vijana na wanawake, pamoja na kuimarisha matumizi ya sayansi, teknolojia na mifumo imara ya uzalishaji na usambazaji wa chakula. Waziri Mkuu amehimiza mataifa ya Afrika kuchukua hatua za pamoja, kuendeleza ubunifu na kujenga mifumo endelevu ya chakula inayoweza kukidhi mahitaji ya vizazi vya sasa na vijavyo. Kwa upande wake, Mwanzilishi na Mhariri Mkuu wa Jarida la Afrika la Chakula, Kilimo, Lishe na Maendeleo, Prof. Ruth Oniang’o, amesema anaamini Tanzania inaweza kuwa mfano kwa mataifa mengine kutokana na hatua inazopiga katika sekta ya kilimo. Prof. Oniang’o amesifu jitihada za Serikali, hususan uwekezaji katika miundombinu, utekelezaji wa programu ya Jenga Kesho Bora (BBT) na matumizi ya maafisa ugani kuwasaidia wakulima kuboresha uzalishaji. Kwa ujumla, lengo la Tanzania kuingia katika orodha ya nchi 10 bora duniani kwa uzalishaji wa chakula linaweka msisitizo katika kuendeleza uwekezaji, kuongeza tija na kutumia fursa za masoko ya kimataifa. Utekelezaji wake utahitaji kuimarisha uzalishaji, kuongeza thamani ya mazao, kupanua fursa kwa wakulima na kuhakikisha chakula kinachozalishwa kinakidhi viwango vya ubora na usalama. Dkt. Mwigulu amehudhuria mkutano huo akiwa ameambatana na Naibu Waziri wa Mambo ya Nje na Ushirikiano wa Afrika Mashariki, Dkt. Ngwaru Maghembe; Naibu Waziri wa Kilimo, David Silinde; Balozi wa Tanzania nchini Marekani, Dkt. Elsie Kanza, pamoja na watendaji wengine wa Serikali.
© 2026 Idara ya Habari-MAELEZO.
